Ish-presidenti Bamir Topi duke analizuar situatën e opozitës, tha se gjithçka është kthyer e pavlerë në atë parti dhe se demokratët janë tradhtuar. Ai u shpreh kritik në qasjen e tij ndaj kreut të PD Sali Berisha, duke e akuzuar atë se ka shuar çdo zë të lirë në parti.

“Berisha është vetë personi që ka shkatërruar në mënyrë sistematike opozitën. Çdo zë i lirë që ka tentuar të dalë është shuar. Edhe manovrat për të punuar me krerë të partive të tjera të opozitës që kanë një jetë që janë aty si Berisha është tentativë për të monopolizuar një sistem. E njëjta gjë ndodh në krahun tjetër kanë të njëjtat karakteristika. Politika është e lidhur me pushtetin. Lideri është shumë i rëndësishëm, por lider në një formacion demokrat. Nuk është problemi që ke monopolizuar një parti, por ke monopolizuar një sistem. Mos mendoni ju që nuk kanë benefite këto të opozitës? Niveli më i ulët është kur e mendon një pozicion politik si një vend pune, ku ke benefite, rrogë, punë, influencë kjo është tradhtia më e madhe që iu është bërë demokratëve”, tha Bamir Topi në një intervistë në “Kjo Javë” në News24.