Gazetari i Euronews Albania, Ardit Hoxha ka dhënë detaje lidhur me mbledhjen e sotme të Këshillit Kombëtar të Partisë Demokratike. Gazetari u shpreh se në këtë mbledhje pritet të diskutohen dy tema kryesore ajo e protestës së 22 dhjetorit dhe çështjet e brendshme të PD-së.

Më tej ai shtoi se diskutimet për protestën kanë nisur që nga e hëna dhe janë zhvilluar takime intensive. Gazetari u shpreh se sa i përket çështjeve të brendshme pritet të diskutohet edhe lëvizja e Ervin Salianjit e cila ka shkaktuar debate.

“Arsyeja e kryesore e thirrjes së kësaj mbledhje ka të bëjë me protestën që PD ka paralajmëruar për më 22 dhjetor, të hënën e ardhme. Përtej diskutimeve dhe fjalëve që do të thuhen nga anëtarët për mbledhjen e kësaj proteste, në fokus do të jetë edhe çështjet e brendshme, debate që ka shkaktuar lëvizja e Salianjit bashkë me disa demokratë që kanë kërkuar përmirësim të mënyrës sesi funksionon PD dhe një lloj lëvizje e brendshme për ta rienergjenizuar këtë forcë politike”, tha ai.