Mes përplasjeve me SPAK, shumë dokumente shihen duke dalë nga Kryeminsitria
Teksa SPAK i ka shkuar te dera, lëvizje të dyshimta janë vënë re në Kryeministri.

Ditën e sotme, një furgon i bardhë mallrash është vendosur te hyrja kryesore dhe është ngarkuar plot me dosje.

Në video shihen disa persona që mbajnë dosje e dokumente në duar dhe i fusin në furgon. Nuk dihet se ku janë dërguar dokumentet, por pamjet janë bërë publike nga përfaqësues të “Shqipëria Bëhet” që qëndrojnë para godinës.

“Pyetje: Ku po shkojnë këto dosje dhe ç’fshihet brenda tyre? Se ç’më kujton një rast të ngjashëm të spastrimit që u bë një vit më parë në Bashki, kur po arrestohej Lali”, shkruan Edona Haklaj.

Largimi i dosjeve vjen në një kohë kur përplasjet mes Ramës dhe SPAK-ut janë shtuar ndjeshëm. Madje edhe BKH ka arritur të trokasë në Kryeministri, ku vetë Rama e pranoi se ka pasur përplasje me ta, sepse nuk donin të dorëzonin armët.

Nga ana tjetër, largimi i dokumenteve vjen në një kohë kur GJKKO la në fuqi pezullimin e zv/kryeministres Balluku dhe, për pasojë, GJKKO mund të shkojë edhe te vetë Kryeministri dhe të kërkojë një masë të tillë. Megjithatë, duhet theksuar se nga institucionet dalin shumë dokumente, shumica arkivohen. Në këtë rast, ende nuk ka një reagim zyrtar.