Qeveria Rama ka hedhur për konsultim publik dy drafte ligjore që synojnë të forcojnë kuadrin ligjor për sekuestrimin e pasurive digjitale, si kriptovalutat.

Nisma vjen pas shqetësimeve të ngritura nga ish-kreu i SPAK, Altin Dumani, i cili theksoi mungesën e një baze të qartë ligjore për sekuestrimin e pasurive virtuale, pavarësisht se deri tani janë bllokuar rreth 11 milionë euro në kriptovaluta me ndihmën e partnerëve ndërkombëtarë.

Sipas projektligjit, administrimi i monedhave virtuale të sekuestruara ose të konfiskuara do t’i kalojë Agjencisë së Administrimit të Pasurive të Sekuestruara dhe të Konfiskuara, ndërsa Këshilli i Ministrave do të përcaktojë rregullat dhe procedurat konkrete për menaxhimin e tyre.

Paralelisht, ligji zgjeron kompetencat e AAPSK, duke i dhënë rol më aktiv në shitjen, dhënien me qira dhe përdorimin e pasurive të sekuestruara. Portofoli i agjencisë zgjerohet edhe me ndërtimet pa leje të konfiskuara, për të cilat parashikohet krijimi i një fondi të posaçëm financiar dhe një modeli të centralizuar administrimi.