Adriatik Lapaj i “Shqipëria Bëhet” dhe mbështetësit e tij po vijojnë protestën përpara Kryeministrisë prej disa ditësh.

Lapaj ka kërkuar që shqiptarët t’i bashkohen revoltës kundër qeverisë dhe atyre që vjedhin miliona euro me një firmë apo me një të rënë të lapsit.

Ai u shpreh se e nisi protestën me një karrige dhe tani secili ka shkuar me karrigen e tij dhe po protestojnë para Kryeministrisë.

LEXO EDHE: Studimi i ri: Kafeja e mëngjesit rrit forcën fizike dhe përmirëson performancën gjatë ditës – efekti është më i madh tek meshkujt”

“E patë çfarë ndodhi në Bullgari? Populli dorëzoi qeverinë të dorëhiqej. Nuk dolën brenda një jave por luftuan me muaj. Nga 5 u bënë 10, 10 mijë, e deri në dorëheqjen e qeverisë. Nuk ngelen pas edhe fermerët grekë, që kanë një javë që janë çuar për gjëra që ne nuk I konsiderojmë fare, i subvencionet. Ka ardhur koha të shporrim autokratin Rama.

Kini besim se ne mund t’ia dalim, nuk ka fuqi më të madhe se protesta e njerëzve të lirë dhe njerëzit kur bashkohen përballë atyre që na vjedhin. Të bashkojmë arsimtarët, fermerët, prindërit, të rinjtë kundër atyre që na vjedhin.

Nuk ka katolik, ortodoks e mysliman në këtë histori, njerëz me ngjyrë e pa ngjyrë, të majtë e të djathtë. Ka vetëm 2 palë, ata që me një rënë të lapsit vjedhin miliona euro, dhe ne poshtë që punojmë për të na vjedhur ata. Duhet të bëhemi bashkë për t’i shembur e për t’i shporrur”, shprehet ai në “Facebook.

Lapaj theksoi se halli i përbashkët për të gjithë është Edi Rama dhe deklaroi se do të vazhdojnë të protestojnë çdo ditë para Kryeministrisë.