Kryeministri Edi Rama komentoi gjatë një interviste në opinion “çelësin” e mbijetesës së gjatë në politikë. Ai nuk i vuri gishtin vetëm një faktori, por theksoi se janë rrethana dhe ngjarje të ndryshme që ndikojnë.

“Nuk e kam pyetur ndonjëherë veten. Unë them që është një kombinim i gjërave, nuk është një gjë. Janë rrethana, janë ngjarje të tjera që diktojnë lëvizje”, tha Rama.

Ai u pyet edhe për ish-kryeministrin e ndjerë Fatos Nano, të cilin e konsideroi si njeri me shumë talent, por me pak vullnet. Ndërsa Sali Berishën e konsideroi më të vullnetshmin në të keqen e vet. Për Metën nuk komentoi gjatë.

Blendi Fevziu: Nano nuk është më në këtë jetë. Nëse do ju kërkoja sot ta përkufizonit në mënyrë realiste, si do ta përkufizonit?

Edi Rama: Në qoftë se do më kërkosh vetëm një fjali do thosha shumë talent, pak vullnet.

Blendi Fevziu: Kush është njeriu politik më i vullnetshëm që keni njohur këto 30 vite?

Edi Rama: Më i vullnetshmi në të keqen e vet është ai miku jot. Pa diskutim.

Blendi Fevziu: Berisha?

Edi Rama: Nuk ia zë emrin unë tani se më duket sikur… Më i vullnetshmi në të keqen e vet është ai miku jot. Ti ia gjete emrin direkt. Se ti ke dhe gjithë këta miq. Si e gjete menjëherë?

Blendi Fevziu: Raporti juaj me Metën?

Edi Rama: Kam shkruar për të në libër dhe pak a shumë është raporti që ka qenë vijimësisht edhe më pas.