Kryeministri ka ndarë në profilin e tij në Facebook një pjesë të fjalës mbrojtëse të parashtruar një ditë më parë nga avokati i Hashim Thaçit, në gjyqin që po mbahet në Hagë ndaj ish-presidentit të Kosovës dhe ish-krerëve të tjerë të UÇK.

“Ja edhe arsyeja kur flet përballë idiotësisë ndërkombëtare”, shkruan Rama krahas videos.

Në deklaratën përmbyllëse një ditë më parë, Luka Misetiç, avokat i Hashim Thaçit iu tha gjykatësve se shpallja fajtor e klientit të tij do të përbënte “padrejtësi ligjore dhe historike”.

“Argumentet e ZPS-së nuk përbëjnë interpretimin e arsyeshëm të vetëm të provave, që është standardi që duhet arritur që ju të rishkruani historinë e Kosovës, në këtë rast për ta shpallur fajtor Hashim Thaçin. Ka dyshime të bazuara të mjaftueshme për ju që ta shpallni atë jofajtor për të gjitha pikat e aktakuzës”.

Pasi të jepen të gjitha deklaratat përmbyllëse, që parashikohet të kryhen deri më 18 shkurt, çështja do t’i kalojë trupit gjykues, që ka tre muaj kohë për shpalljen e një aktgjykimi.

Thaçi, Veseli, Selimi e Krasniqi po qëndrojnë në paraburgimin e Gjykatës Speciale në Hagë prej fillimit të nëntorit të vitit 2020, të akuzuar për krime lufte dhe krime kundër njerëzimit. Prokuroria e Specializuar i akuzon ata se kanë qenë ose duhej të ishin në dijeni të këtyre krimeve.