Demokrati Ilir Alimehmeti ishte i ftuar në emisionit “ÇdoKënd” me gazetaren Merita Haklaj në A2 CNN ku u shpreh se lëvizja e organizuar nga Ervin Salianji, pjesë e së cilës është edhe vetë ai, nuk është një lëvizje anti-kryetar. Ilir Alimehmeti deklaroi se qëllimi i kësaj lëvizjeje është të kërkojë organizim të PD-së.

Alimehmeti u shpreh se në situatën aktuale PD është e përgjumur dhe ka nevojë të riorganizohet dhe të përfaqësojë më së miri votuesit.

“Duhet të kuptojmë diçka të rëndësishme. Këtu ne nuk jemi duke folur për një diskutim politik, për një lidership politik apo për mendime politike të ndryshme. Pra nuk është një lëvizje e këtij tipi. Është një lëvizje që kërkon organizim.

Pra ne po çojmë nevojën, pra kemi nevojë të riorganizohemi, kemi nevojë të ripërfaqësohemi. Sepse kështu siç jemi nuk po bëjmë dot maksimumin tonë.

Atëherë në këtë aspekt ne kemi nevojë për një organizim më të mirë. Sepse po dukej sikur ishte përgjumur situata dhe nuk shkon kjo. Është mandati i katërt që po qeveris Rama dhe nuk na lejohet kjo. Se nuk është as lëvizje anti-kryetar, sepse kanë dashur ta spostojnë vëmendjen këtu”, tha Alimehmeti.