Në një intervistë për emisionin “Quo Vadis” në Vizion Plus, prifti françeskan Landi Jaku ka rrëfyer disa mrekulli që, sipas tij, kanë ndodhur në Kishën e Shna Ndout në Laç. Jaku, i cili shprehet se i ka parë disa prej këtyre ngjarjeve me sytë e tij, tregoi dy raste specifike që kanë lënë mbresa të thella tek ai.

Jaku rrëfeu historinë e një gruaje që vuante nga një gjendje e rëndë mendore. “E kam parë me sytë e mi, ajo hante gurë,” tha ai. Pas disa javësh lutjesh të vazhdueshme nga familjarët e saj në kishë, gruaja u shërua plotësisht.

“E kam parë tani vonë ishte bërë me djalë, dhe ishin të dy shumë mirë,” shtoi prifti, duke theksuar se kishte dëshmuar si gjendjen e saj të rëndë, ashtu edhe shërimin.

Rikthimi i shikimit dhe mjegulla shpëtimtare
Një tjetër rast i rrëfyer nga Jaku ishte ai i një gruaje që kishte humbur plotësisht shikimin. Ajo u soll në kishë nga familja e saj dhe pas lutjeve “me shpirt”, fitoi dritën e syve. Prifti theksoi se kjo grua jeton ende sot, duke e bërë këtë dëshmi edhe më të prekshme.

Një punëtor i kishës i ka rrëfyer gjithashtu një mrekulli tjetër të çuditshme: një zotëri nga Mirdita, i cili ndiqej nga policia, kishte shkuar në kishë për t’u lutur. Kur e pa policinë, ndryshoi rrugë duke u futur nga përroi i kishës.

Sipas dëshmitarit, “u bë i gjithë vendi mjegull”, çka bëri që policët të humbnin gjurmët dhe të ktheheshin mbrapsh. Jaku shprehet se ky besim i fortë i personit i ka mundësuar ndihmën hyjnore për të shpëtuar nga ndjekja. Këto rrëfime, sipas priftit, tregojnë fuqinë e besimit dhe lutjes në jetën e njerëzve.