Ministria e Mjedisit Jetësor dhe Planifikimit Hapësinor ka njoftuar se në disa pika matëse në Shkup është tejkaluar gjatë dy ditëve radhazi pragu kritik për grimcat e pezulluara me madhësi deri në 10 mikrometra (mbi 150 mikrogram/m³). Bëhet fjalë për pjesën e qendrës dhe zona të tjera si Gazi Babë, Karposh, Lisiçe dhe Rektorat.

Ministria ka dhënë një seri rekomandimesh për të përballuar situatën. Ajo kërkon që të intensifikohen mbikëqyrjet inspektuese ndaj instalimeve me Leje Ekologjike të Integruar të tipit A, si dhe kontrolle në terren të instalimeve me Leje Ekologjike të Integruar të tipit B dhe Elaborate. Instalimet me monitorim të vazhdueshëm duhet të mundësojnë qasje publike në të dhënat e matura.

Gjithashtu, ministria rekomandon intensifikimin e kontrolleve teknike të automjeteve, veçanërisht të atyre me djegie të brendshme dhe të automjeteve të paregjistruara, si dhe kontrollin e kantierëve të ndërtimit.