Një incident teknik gjatë transmetimit live nga shtëpia e “Big Brother VIP Kosova” ka nxjerrë zbuluar një përplasje të ashpër që po ndodhte prapa dyerve të mbyllura, duke shokuar jo vetëm publikun, por edhe vetë banorët.

Teksa Elijona, Londrimi dhe Klodi po qëndronin në ambientin e ndenjes (living), qetësia është thyer nga ulërima të forta që vinin nga dhoma e rrëfimit.

Ajo që është dëgjuar ka qenë zëri i producentes Olsa Muhameti, e cila po i bërtiste me tone mjaft të larta dhe agresive banores Dolce.

Të zënë ngushtë nga situata, banorët në sallon kanë mbetur fillimisht të shtangur. Më pas, ata kanë tentuar ta “kamuflojnë” situatën duke filluar të këndojnë dhe të flasin me zë të lartë, në përpjekje për të mbytur zhurmën e sherrit që po transmetohej.

Por, momenti kulminant ka qenë reagimi i Londrimit. Duke parë që debati po dëgjohej qartë, ai i është afruar mikrofonit të tij dhe i ka dhënë një paralajmërim stafit teknik:

“Vëllai i Madh, po dëgjohesh, po ule zërin.”

Kjo video po bën xhiron e rrjetit, duke ngritur diskutime të forta mbi presionin dhe mënyrën e komunikimit të produksionit me banorët brenda dhomës së rrëfimit.