Virozat sezonale dhe gripi kanë sjellë një fluks të lartë pacientësh në Urgjencën e Spitalit Rajonal të Fierit, ku çdo ditë paraqiten për ndihmë mjekësore mbi 120 qytetarë ndërsa muaji janar ka shënuar rekord vizitash, me rreth 4 mijë raste.

Sipas mjekes Ilva Çuni, grupmoshat më të prekura janë 15–25 vjeç dhe 70–80 vjeç, ndërsa nuk kanë munguar as rastet fatale.

Mjekja Çuni bën me dije se gjatë pikut të gripit, në muajt nëntor dhe dhjetor, numri i vizitave ditore ka arritur deri në 160 raste brenda 24 orëve.

Sipas saj, gripi i këtij viti është karakterizuar nga një kohëzgjatje më e madhe e simptomave, si edhe nga rikthimi i tyre pas disa ditësh përmirësimi, krahasuar me një vit më parë.

Më të prekur nga gjendjet virale kanë qenë pacientët me sëmundje kronike, një pjesë e të cilëve kanë kërkuar edhe hospitalizim. Mjekja Çuni apelon për kujdes të shtuar në përdorimin e antibiotikëve, të cilët duhet të merren vetëm me rekomandimin e mjekut të familjes.